Всея́ тва́ри Содѣ́телю, и́же времена́ и лѣ́та Свое́ю о́бластію положи́выи, благослови́ вѣне́цъ лѣ́ту бла́гости Твоея́ Го́споди, сохраня́я въ ми́рѣ гра́дъ и лю́ди Твоя́, моли́твами Богоро́дицы, по вели́цѣй Твое́й ми́лости (Тропа́рь, гла́съ 2).

Въ Вы́шнихъ живы́и Христе́ Царю́, всѣ́мъ ви́димымъ и неви́димымъ Тво́рче и Зижди́телю, И́же дні́е и но́щи, времена́ и лѣ́та сотвори́выи, благослови́ ны́нѣ вѣне́цъ лѣ́ту, соблюди́ и сохрани́ въ ми́рѣ гра́дъ и лю́ди Твоя́ Многоми́лостиве (Конда́къ, гла́съ 2).

Индиктом называют годовой круг богослужения. Начало индикта, или начало церковного новолетия, приходится на 1 сентября юлианского календаря и является церковным праздником.

1 Тим 2:1-7; Зач. 282

Чадо Тимоѳeе, молю убо прeжде всѣхъ творити молитвы, молeнія, прошeнія, благодарeнія за вся человѣки, за царя, и за вся иже во власти суть, да тихо и безмолвно житіе поживeмъ, во всякомъ благовѣріи и чистотѣ. Се бо добро и пріятно предъ Спасителемъ нашимъ Богомъ, иже всѣмъ человѣкомъ хощетъ спастися, и въ разумъ истинныи пріити. Единъ бо есть Богъ, и единъ ходатай Богу и человѣкомъ, человѣкъ Христосъ Ісусъ, давыи себе избавлeніе за всѣхъ. свѣдѣтельство времены своими. въ нeже поставленъ быхъ азъ проповѣдникъ и апостолъ. Истину глаголю о Христѣ не лжу, учитель языкомъ въ вѣрѣ и истинѣ.

Лк 4:16-22; Зач. 13

Во время оно, пріиде Ісусъ въ назарeѳъ, идѣже бѣ воспитанъ, и вниде по обычаю своему въ день суботныи въ сонмище, и воста чести. и даша ему книгу Ісаіа пророка. и разгнувъ книгу, обрѣте мѣсто, идѣже бѣ написано. духъ Господень на мнѣ, его же ради помаза мя, благовѣстити нищимъ посла мя, исцѣлити сокрушeныя сердцемъ, проповѣдати плѣнeннымъ отпущeніе, и слѣпымъ прозрѣніе, отпу стити сокрушeныя въ отраду, проповѣдати лѣто Господне пріятно. И согнувъ книгу, отдавъ слузѣ, сѣде. и всѣмъ въ сонмищи очи бѣху зряще нань. И начатъ глаголати къ нимъ, яко днeсь сбысться писаніе се во ушію вашею. и вси свѣдѣтельствоваху ему. И дивляхуся о словесѣхъ благодати, исходящихъ изъ устъ его.