Дне́сь спасе́нію на́шему нача́токъ, и вѣ́чнѣй та́йнѣ явле́ніе. Сы́нъ Бо́жіи, Сы́нъ Дѣ́выя быва́етъ. И Гавріи́лъ ра́дость благовѣству́етъ. Тѣ́мъ и мы́ съ ни́мъ Богоро́дицѣ возопіе́мъ, ра́дуися Обра́дованная Госпо́дь съ Тобо́ю (Тропарь Благовѣщенію, гласъ 4).

Възбра́нной Воево́дѣ побѣди́тельная, я́ко изба́вльшеся отъ злы́хъ, благода́рственая воспису́емъ Ти раби́ Твои́ Богоро́дице. Но я́ко иму́щи держа́ву непобѣди́мую, отъ вся́кихъ на́съ бѣ́дъ свободи́. Да зове́мъ Ти, ра́дуися Невѣ́сто Неневѣ́стная (Кондакъ Благовѣщенію, гласъ 8).

Спаси́ Го́споди лю́ди Своя́, и благослови́ достоя́ніе Свое́, побѣ́ды на сопроти́вныя да́руй, и Своя́ сохраня́я Кресто́мъ лю́ди (Тропарь Кресту, гласъ 1).

Не оу́же ктому́ пла́менное ору́жіе храни́тъ вра́тъ Еде́мскихъ. Сіе́ бо на́йде пресла́вное наи́тіе, дре́во кре́стное, сме́ртное жа́ло, и а́дову побѣ́ду разори́. Прише́лъ бо еси́ Спа́се мо́й, вопія́ су́щимъ во а́дѣ, вни́дите па́ки въ ра́й (Кондакъ Кресту, гласъ 7).

Евр 2:11-18; Зач. 306
(Благовѣщенія)

Брaтіе, егда святяяи и святяеміи, отъ единого вси. ея же ради вины не стыдится братію нарицати ихъ глаголя, возвѣщу имя твое братіи моeй, посредѣ церкви воспою тя. и паки, азъ буду надѣяся нань. и паки, се азъ и дѣти яже ми далъ Богъ. Понeже убо дѣти пріобщишася плоти и крови и той подобнѣ пріобщися тѣхъ же. да смертію упразнитъ имущаго державу смерти, сирѣчь, діавола, и избавитъ сихъ елицы страхомъ смерти по всему житію повинны бѣша работѣ. не отъ ангелъ убо когда пріeмлетъ, но отъ сѣмене Авраамова пріeмлетъ, отнюду же долженъ бѣ по всему подобитися братіи, да милостивъ будетъ и вѣренъ первосвященникъ яже къ Богу, во еже очистити грѣхи людскія. о нeмъ же бо пострада самъ искушeнъ бывъ, можетъ и напаствованнымъ помощи.

Лк 1:24-38; Зач. 3
(Благовѣщенія)

Во днeхъ онѣхъ, зачатъ Елисавeѳъ жена Захаріина, и таяшеся месяцъ пять глаголющи, яко тако мнѣ сотвори Господь во дни, въ ня же призрѣ отяти поношeніе мое въ человецѣхъ. Въ месяцъ же шестыи, посланъ бысть ангелъ Гавріилъ отъ Бога, во градъ Галилeйскыи, ему же имя Назарeѳъ, къ дѣвѣй обручeнѣй мужеви ему же имя Іосифъ, отъ дому Давыдова, и имя дѣвѣй Маріамъ. и вшeдъ къ нeй ангелъ, рече. радуйся обрадованная, Господь съ тобою, благословeна ты въ женахъ. она же видѣвши, смутися о словеси его, и помышляше каково будетъ цѣлованіе се. И рече ангелъ ей. не бойся Маріамъ, обрѣте бо благодать отъ Бога. и се зачнеши во чревѣ, и родиши Сына, и наречeши имя ему Ісусъ. сeй будетъ вeліи, и Сынъ Вышняго наречeтся. и дастъ ему Господь Богъ престолъ Давида отца его, и воцарится въ дому Іаковли во вѣкы, и царствію его не будетъ конца. Речe же Маріамъ ко ангелу. како будетъ се, идѣже мужа не знаю; и отвѣщавъ ангелъ, рече ей, Духъ Святыи найдетъ на тя, и сила вышняго осѣнитъ тя. Тѣмъ же и раждаемое свято, наречeтся Сынъ Божіи. И се Елисавeѳь южика твоя, и та зачатъ сына въ старости своeй. и сіи месяцъ шестыи есть ей, нарицаемѣй неплоды. яко не изнеможетъ отъ Бога всякъ глаголъ. Речe же Маріамъ. се раба Господня, буди мнѣ по глаголу твоему. и отиде отъ нея ангелъ.

Евр 4:14 – 5:6; Зач. 311

Брaтіе, имуще первосвятителя велика, прошeдшаго небеса, Ісуса Сына Божія, да держимся исповѣданія. не имамы бо архіерeя немогуща спострадати нeмощемъ нашимъ, но искушeна по всяческихъ, по подобію, развѣ грѣха. да приступаемъ убо со дерзновeніемъ къ престолу благодати, яко да пріимемъ милость и благодать обрящемъ въ благоврeменную помощь. Всякъ бо первосвященникъ, отъ человѣкъ пріeмлемъ, за человѣки поставляется на службы яже къ Богу, да приноситъ дары же и жeртвы о грѣсѣхъ. равно смирeніемъ спострадати могіи о невѣжъствующихъ и заблуждаю щихъ, понeже и той нeмощію обложeнъ есть. и сего ради долженъ есть яко же о людехъ, тако же и себе ради приносити о грѣсѣхъ. И никтоже собою пріeмлетъ чeсть, но званныи отъ Бога, яко же и Ааронъ. Тако и Христосъ не себе прослави быти первосвященнику, но глаголавыи къ нему. Сынъ мой еси ты, азъ днeсь родихъ тя. Яко же и инде глаголетъ, ты еси священникъ во вѣкы по чину Мелхиседeкову.

Мк 8:34 – 9:1; Зач. 37

Рече Господь, иже хощетъ по мнѣ ити, да отвeржется себе, и возметъ крестъ свой, и по мнѣ грядeтъ. Иже бо аще хощетъ душу свою спасти, погубитъ ю. а иже погубитъ душу свою мене ради, и евангелія, той спасeтъ ю. Кая бо польза человѣку, аще пріобрящетъ миръ вeсь, и отщетитъ душу свою; или что дастъ человѣкъ измѣну на души своeй; иже бо аще постыдится мене, и моихъ словeсъ, въ родѣ сeмъ прелюбодѣйнемъ и грѣшнемъ, и Сынъ Человеческіи постыдится его, егда пріидетъ въ славѣ отца своего, со ангелы святыми. И глаголаше имъ. аминь глаголю вамъ, яко суть нѣціи отъ здѣ стоящихъ, иже не имутъ вкусити смерти, дондеже видятъ царствіе Божіе пришeдшее въ силѣ.